සංවරයක් නැති සංචරණ සීමා

         ශ්‍රී ලංකාව තුළ කොරෝනා වෛරස් රෝගය හෙවත් කොවිඩි ශීඝ්‍රෙයෙන් ව්‍යප්ත වෙමින් පවතී. මෙම තත්වය පාලනය කිරීමට පිළියමක් ලෙස රජය විසින් දිවයින පුරා දැඩි සංචරණ සීමා පණවා ඇත. තවත් ප්‍රදේශ විශාල සංඛාවක් හුදකලා කර ඇත. පසුගිය  25 වෙනිදින සංචරණ සීමා ලිහිල් කළ බවට රජය විසින් නිවේදනය කරන ලදී. ලිහිල් කරන ලද සංචරණ සීමා යටතේ අත්‍යවශ්‍ය බඩු සහ බෙහෙත් මිලදී ගැනීමට නිවසේ එක් අයෙකුට යා හැකි බවත් එසේ යා යුත්තේ පා ගමනින් බවත් තම නිවසට ආසන්න වෙළද සැලට යා හැකි බවත් බලධාරින් විසින් දන්වන ලදී. මෙම නියෝගවල නොයෙකුත් ප්‍රශ්නාර්ථයන් තිබිය හැක එය වෙනම කාරණාවකි.

        මෙම සංචරණ සීමා ලිහිල් කිරීමේ විධි විධාන කොතෙක් දුරට මහජනයා විසින් පිළිපැද්දේද යන්න අප ජීවත් වන වත්තල ප්‍රදේශය ආශ්‍රෙයන් අගයීමකට ලක් කිරීමටම හැකිවීම වත්තල අපට මහත් නම්බුකාර කමකි  25 වෙනි දින උදේ පාන්දර සිටම වත්තල සියළුම සුපිරි වෙළද සැල්වල රථ ගාල් රථවාහන වලින් පිරී ඉතිරුණි. ත්‍රි විල් සහ යතුරුපැදි ද ඒ අතර විය. සෑම පාරකම වාහන ධාවනය විය. ත්‍රිවිල් මල්ලිලා, මෝටර්බයිසිකල් නංගිලා ප්‍රකාශකලේ  පොලිස් කාරයෝ නැහැ යන්ඩ පුළුවන් කියාය. ලොක්ඩවුන් කළ ප්‍රදේශවල මාර්ග භාධක වලද පොලිසිය නැති බවත් කිසිවෙන් සොයා නොබලන බවටත් කාලකණ්නි සන්තෝෂයකින් යුතුව ප්‍රකාශ කළේ පුංචි මිනිසුන් පමණක් නොව ලොකු ලොකු කාර්බාර් පදවන මහත්වරුන්ද විසිනි.  

        මෙම සිමා පනවා ඇත්තේ රටේ පවතින යුධ තත්වයක් නිසා හෝ හොරබඩු ඇල්ලීමට නොව මහජනතාව වසංගතයෙන් ආරක්ෂා කර ගැනීමට බව මෙම ඔලමොට්ටල අහංකාර අසමජ්ජාති ඔළුගෙඩිවලට නොතේරීම කොතරම් කණගාටුදායකද? පොලිස් නිලධාරින් හෝ හමුදා නිලධාරින් මේ ස්ථානවල රදවා නීති පිළිපදින ලෙස ඇගිල්ලෙන් ඇණ ඇණ කිව යුතුද? එසේ නැත්නම් එය මහජනතාවගේ වගකීමක් නොවන්නේද, පොලිසියේ හමුදාවේ ඉන්නේ ඔබේ අපේ සහොදර සහොදරයින්, දරුවන් නොවන්නේද ඔවුන්ද මනුෂ්‍යයන් නොවන්නේද? ඔවුන් කොරෝනා හැදෙන්නේ නැද්ද. මේවා වරක් දෙවරක් නොව කීපවරක්ම සිතා බැලිය යුතු කාරණාය.

අප කථා කරන ප්‍රදේශයේ කුමන ස්ථානයක සිටියත් තමන්ගේ බෙහෙත් ටික නිවසටම ගෙනගොස් දීමට අපේ පාමසි මහත්වරු පිරිස සූදානම්ය. පසුගිය 25 දින ඔවුන් ඒ සදහා කිසිදු ප්‍රවාහන ගාස්තුවක්ද අයකළේ නැත. මුදල බැංකු කාඩ් සහ ගිණුමට මුදල් මාරු කිරීම වැනි තුන් ආකාරයෙන්ම එතුමන්ලාගේ සේවය සපයා තිබුණි. තවද පවත්නා සුපිරි වෙළදසැල් ජාලය මගින් නිවසටම බඩු ගෙනවිත් දෙන්නේ ඉතා සුළු ප්‍රවාහන ගාස්තුවක්  අය කිරීමෙනි. ඔන් ලයින් මාළු වෙළද මහන්තුරුද වත්තල ඇත. දන්නා පරිදි ඔවුන්ද ප්‍රවාහන ගාස්තු අය නොකරයි. එහෙත් මේවාට අතේ මුදල් පමණක් තිබිලා මදිය. බැංකු ගිණුමක් බැංකු කාඩ් එකක් තිබීමද ප්‍රමාණයත්ය. පුදුමය වන්න් ලක්ෂගණන් වටිනා වාහන පාවිච්චි කරන අය මෙම පහසුකම් ප්‍රයෝජනයට ගැනීම අතපසුකර තම වාහනවලින් වෙළදපොලවල් කරා ඇදීමය. මොවුන්ට ඉහත පහසුකම් නැද්ද එසේ නැත්නම් ඒ ගැන දන්නේ නැද්ද, දන්න එකෙක් ගෙදර නැද්ද යන කාරණා ප්‍රශ්නාර්ථතයන්ය. මොවුන් කුණු කොල්ලයට කුණුබඩු සෙව්වාද නොදනිමි.

තවත් කාරණාවක් වන්නේ ජනමාධ්‍ය හරහා පංපෝරි ගසමින් නිවසටම බඩු ගෙනවිත් දෙන බවට මුසාවාද දෙසාබාන ආයතනයක් නිසා මහජනතාව අතර ඔන් ලයින් ගැන විශ්වාෂය පළුදු වීමද විය හැක.

බැංකු ගිණුමකුත් නැති අතේ ලොකු මුදලකුත් නැති ඔන් ලයින් ගැන නොදන්නා අහිංසක මිනිසුන් වත්තලද සිටිය හැක. එම අයට සංවරණ සීමා ලිහිල් කිරීමේ වාසිය ලබා දී ඇති හැකි වුන්ට ගෙදරට වී රටේ නීතියද ආරක්ෂා කරමින් විනය ගරුක පුද්ගලයින් ලෙස ගෙදරට වී සිටීමට ඕනෑතරම් අවස්ථාව තිබුණි.ඔවුන් මෙම අවස්ථාව, තමන්ගේ යුතුකම, තමන්ගේ වගකීම පැහැර හැරීම තුළ තවත් අහිංසකයන් වල පල්ලට තල්ලුකර දැමීමට උත්සාහ කිරීම මිනිමැරීමට තැත් කිරීමේ චෝදනාවක් තරමටම බරපතලය. මෙවනි පොදිගැසීම් තුළ ආසාධනයට පත්වන අහිංසක මිනිසුන්ට යන එන මං නැත. රෝහල් වල ඉඩ නැත. හෝටල් කාමර වෙන්කරගත නොහැක. මේ එක් පැත්තකි. තවත් පැත්තක් වන්නේ වසංගතය දිග්ගැසීම නිසා අනෙකුත් රෝගවලින් පෙළෙන අයට එම රෝග උත්සන්න වීමන් මරණය වැලද ගැනීමට සිදුවීමය. හදිසියේ ඇතිවන අසනීපයකදී මෙන්ම හදිසි අනතුරකදීත් සිදු වන්නේද මේ ටිකමය මේ සියල්ලන්ටම වඩා අනිටු ප්‍රතිඵලය වන්නේ එදා වේල සොයාගන්නා අසරණ දරුපවුල්වලට කෑමක් බීමක් නැති වීමය.

පාට පාට කණ්නාඩි දමාගෙන වසංගතය ගජ වාසියක් කර ගැනීමට තැත් කරන නම්බුකාර මහත්වරුන්ගෙන් ඉතා කාරුණිකව ඉල්ලා සිටින්නේ රට ගැනත් රටේ ජීවත් වන අහිංසක මිනිසුන් ගැනත් සිතන ලෙසය.තමන්ගේ ආරක්ෂාව තමන් සපයා ගත යුතුය යන අදහස කාතුළ වුවත් ඒකටවත් ඉඩ නොදෙන අසංවර මිනිසුන් හෙලා දැකිය යුතු කාලය එළඹ ඇත.

මෙම කාරණාාවට වත්තල යොදාගත්තේ වත්තල පමණක් මෙවැනි දේ සිදුවූ නිසා නොව. නියදියක් වශයෙන් පමණි. රටේ අනෙත් තැන්වල තත්වයන් මීටත් අන්ත බව ජනමාධ්‍යෙයන් දැනගතිමි. එබැවින් වත්තල අපේ මිනිසුන්ට අමනාපවීමට කාරණාවක් නැත. හිත රිදුනානම් සමාවන සේක්වා. 

නැවත හමුවෙමු. සැමට සුවසෙත ආයුබෝවන් 

බුලත්විටේ සැගවුණ කොවිඩ් මාරයා........

 

        බුලත් සහ සිංහලයා අතර ඇත්තේ පුදුමාකාර සම්බන්ධයකි.මංගල මෙන්ම අවමංගල අවස්ථාවන්වලදීද පෙරට එන්නේ බුලත්ය.සිංහලායට පමණක් නොව දෙමලාටද බුලත නැතිවම බැරිය. පංසලේ කෝවිලේ වෙදකමේ ගුරුකමේ බුලතට ඇත්තේ අසිමීත සම්බන්ධතාවකි.නැතිවම බැරි බුලත අද තවත් මරාලයකි.එයද නිකම්ම මරාලයක් නොව මාර මරාලයකි. එසේකියන්නේ නැතිවම බැරි බුලත මිනිසුන්ගේ දිවි තොරකර දැමීමට කුමන හෝ දායකත්වයක් දරණ නිසාවෙනි. ඉස්සර බුලතින් ඇතිවන්නේ පිළිකා පමණි. ඒත් කලාතුරකිනි. දැන් බුලත් කොරෝනා මාරයාගේද ගජ මිතුරෙකි.

        බුලත්විට කඩ මෙන්ම ගමේ කඩේද බුලත්විට ඇත. ඉස්සර කඩේ මුදලාලිද බුලත් පුවක් හුණු දුංකල ගෙනවිත් බුලත්විට සාදා වික්කේය. දැන් එසේ නැත කවුරුන් හෝ හදාගෙනවිත් බුලත්විට කඩවලට දමති. බුලත්විට හදන එකාට මෙලෝ නීතියක් නැත. සෞක්‍ය වත්පිළිවෙත් නැත. බොහෝ අය ගෝනි පඩංගුවක් එළා ඒ මත සිට බුලත්විට සදති. මේ ඇසින් දුටු දේවල්ය.

        මෙසේ හදන බුලත් කඩවලට බෙදා හරිති. බොහෝ විට බුලත්විට ඔතන්නේ භාගයක් එළියට සිටින සේ පුංචි කොල කෑල්ලකය. බුලත්විටක් ඉල්ලූ විට මුදලාලිලා බුලත්විට ඔහුගේ කවුන්ටරය මතට දමති. මුදල් දීපු අතින්ම, ඉතුරු සල්ලි ගත්ත අතින්ම බුලත්විට ඉල්ලපු එකාලා එතන සිටගෙනම බුලත්විට ලිහා කන්ඩ පටන් ගනී. බොහෝ විට පුවක් කෑල්ල කපා කඩේ මිදලටම කෙළ ගසති. බුලත්විට කන්නේ තම්බලා නොව, විෂබීජ හරණය කර නොව අමුවෙනි. කොවිඩ මිතුරාද මෙම බුලත්විට සමග අත්වැල් බැදගෙන ඇත.

        බුලත් කාපු එකා කරන්නේ පාර පුරා කෙළ ගසමින් යාමය. ඌට කොවිඩ්නම් ඒ කෙළවලින් කොවිඩ් සෑදිමට බැරි කමක් නැත. බස් එකක කෝච්චියක ගියත් හපේ කටේය. අවස්ථාවක් ලද විට කටේ ඇති කෙළ තලිය පාරට මුදා හරිති. එය කාගේ ඇගට වැටෙනාවද යන්න ගැන ඌට වගේ වගක් නැත. මෙ ලියන එකාද හොද බුලත් කෙළ පාරක් යතුරුපැදියෙන් බස් රථයක් ආසන්නයෙන් යන විට කාපු එකෙකි. එදා දැනුනු හිරිකිතය ගූ මුට්ටියක් නෑවාටත් වැඩිය. හොද වෙලාවට ඒ කාලයේ කොවිඩ් කියා මගුලක් තිබුණේ නැත. අද කාලයේ වුණානම් නවතින්නේ නිරෝධායනයෙනි.

        මෙම සටහන කියවන සමහර අය අහිංසක බුලත්විට කාරයාටත් කෙළින්ඩ හදනවා කියා හිතන්ඩ ඉඩ ඇත. එහෙත් අහිංසක මිනිසුන්ගේ ජීවිත ඊට වඩා වටිනවාය.රටේ අනාගතය ඊට වඩා වටිනවාය.

      මේ අවස්ථාවේදී හැකි තරම් ආසාධිතයන් අඩුකර ගත යුතුය.අනිත් මිනිසුන් ගැනද හිතිය යුතුය. රෝගින් වැඩිවන විට රෝහල් පිරී ඉතිරි යයි. එවිට සාමාන්‍ය ලෙඩකුට ප්‍රතිකාරයක් ගැනීමට ඇති අවස්ථාවද නැතිවේ. එමෙන්ම අප වෙනුවෙන් ජීවිත පරදුවට තබා දිවා රෑ වෙහෙසෙන සෞක්‍ය කාර්යය මණ්ඩළයේ සියළු දෙනා ග්‍රාම නිලධාරින්, පොලිස් හමුදා නිලධාරින් වැනි කී නොකී සියළු දෙනා ගැනද සිතිය යුතුය. එය අපේ යුතුකමකි.

    නැවතත් කියන්නේ මෙය බුලත්විටටත් කෙළින්ඩ හදන ප්‍රයත්නයක් නොවන බවය. බුලත්විට හදන මනුෂ්‍යයාගෙනුත් බුලත්විට කන මනුෂ්‍යයාගෙනුත් ඉතා කාරුණිකව, ඉතා ගෞරවයෙන් ඉල්ලා සිටින්නේ එම කටයුත්ත සෞඛ්‍ය වත්පිළිවෙත් අනුව කරන ලෙසය. මෙහි භාවිතා කර ඇත්තේ අසංවර භාෂාවක් බව සිතන්ඩ එපාය. කාටත් තේරෙන්ඩ මෙව්වා ලිවිය යුතුය. මහප්පරාන්න අවශ්‍ය නැත. බුලත් කන්නේත් විකුණන්නේත් හදන්නේත් අපේ වුන්ය. ලෙන්ගතු කමින් උන් ඇමතුවට උන් තරහ වේන්නේ නැති බව හෙට ඉරපායන ලෙසටම විශ්වාෂය. නැවත හමුවෙමු ආයුබෝ වේවා! නිරෝගිවේවා ! නිදුක් වෙත්වා ! ජය වේවා!